رواية الرجل الأخر جميع الفصول كاملة
قالي انتي تعبانه يا حنين …خشي ارتاحي
وانا هخلص الأطباق وأحصلك
شيلت إيده من عليا وزعقت فيه
لأ
بص لي بأستغراب وقال مالك
لأ…مش تعبانه روح انت وانا هخلصهم
مش بقولك واضح انك تعبانه..وفيها أيه اني اساعد
مراتي حبيبتي شوية
ودا من امتى بقى !!
بس ادخلي وانا هعملنا 2 لمون عشان تهدي اعصابك
سبت المطبخ ودخلت أوضتي
مين الراجل اللي ف المطبخ دا ؟
اكيد مش جوزي..طب وبعدين انا خايفه ومرعوبه
عايشه مع حد معرفوش..
أتسحبت من أوضتي..وروحت تاني
ع المطبخ عشان أراقبه بيعمل ايه
يوسف عمره ما طلب مني يساعدني في شغل البيت
ايه غيره.. يمكن يكون بيعرف وحده عليا
وعشان ضميره ميتعبوش..بيحاول يكون رومانسي معايا
مش عارفه !!
بس يوسف بيحبني انا وعمره ما فكر يخوني
انا مهتمه بيه جدا..خصوصا وأنه مفيش عندنا أطفال
ممكن يشغلوني عنه
قربت من المطبخ واتفاجأت لما لقيته خلص غسل الاطباق
بسرعه رهيبة..
بدأ في تقشير الليمون وتقطيعه … فجأة وهو بيقطع
اللمونه بالسكين..صباعه اتعور..ونزف
حسيت قلبي وجعني عليه ودخلت اقوله سلامتك
قالي في ايه يا روحي..ايه جابك تاني
خوفت اقوله انت اتعورت..يقولي انتي بتراقبيني
مسكت إيده وقربتها مني..وببص ليها
ملقتش أثر للدم ولا للجرح !!
بصيت له بأندهاش وقولت طب ازاي ؟
قالي ببرود..أزاي ايه ؟
سبته ورجعت الأوضة..لكني لفيت بسرعه
ولمحته..ماسك السكين وبيلحس أثار الدم من عليها
حمدت ربنا انه مخدش باله اني شوفته
دخلت الأوضة وقفلت على نفسي من جوه
جاب العصير وخبط
كنت قاعده على سريري وضامه ركبي لصدري
وحاضنه نفسي وبعيط
طيب مالك بس..فيكي ايه
كنت كاتمه صوت بكايا عشان ميسمعنيش
لكنه فاجأني وقال
بتعيطي ليه طيب..احكي لجوزك حبيبك
صرخت فيه وقولت
أبعد عني مش عايزه اسمع صوتك
سمعت صوت خطواته..رجع الصاله
ونام هناك ع الكنبة
أول ليلة ينام بعيد عني
فتحت باب أوضتي الصبح لقيته محضر
لي الفطار وساب لي ورقة كاتب فيها
